SIGADLE kwaze kwaba kabili isishingishane esishiye kukhalwa ezindaweni ezakhelene neNquthu naseVryheid esiqale ngoLwesine ntambama saphinde sabuya ngoLwesihlanu ebusuku.

Umphakathi waseMondlo, KwaGrace, Majuba, nakwezinye izindawo eMsinga usale dengwane njengoba namanje ugesi ungekho kwezinye izindawo kusuka ngoLwesine.

IMEYA yaseBaqulusini uMnuz Khehla Mkhwanazi noNksz Sbongokuhle Dlamini oyimenenja kulo mkhandlu behlola umonakalo odalwe isishingishane esigadle kakhulu emizini yabantu nakwingqalasizinda Isithombe: SITHUNYELWE

Ezinkundleni zokuxhumana abantu bakulezi zindawo bebelokhu besibabazile lesi sishingishane abathi sidonse ihora lonke ngoLwesihlanu.

AMATHIMBA alungisa ugesi eMondlo aqalile ukusebenza njengoba kube nokukhahlamezeka ngemuva kokuhlasela kwesishingishane ngoLwesihlanu ebusuku Izithombe: ZITHUNYELWE

IMeya yaseBaqulusini uMnuz Khehla Mkhwanazi ithe sekuyabakhathaza ukuhlasela kwesimo sezulu ngale ndlela kuleli dolobha njengoba nangosuku lukaNcibijane kwasala imigwaqo imibi ngenxa yezikhukhula ezabahlasela.

“Sibi isimo esibhekene naso manje. Kodwa okwenzekile kulokhu imvula ibingenkulu, kuhlasele isichotho, umoya onamandla nokuyiwona ofike waphephula imizi yabantu wawisa nezigxobo zikagesi. Endaweni yaKwaHlahlindlela ngaseMondlo, ingaphezu kuka-50 imizi ephephukile. Ugesi kulaba abaxhunyelwe umasipala usulungile kodwa kulaba abawuthola e-Eskom, namanje usalungiswa,” kuchaza uMkhwanazi.

Uthe okunye okuphazamisekile ukuhamba kwamanzi njengoba besebenzisa ugesi ukwenza umfutho wawo ube phezulu, manje aphuma kancane.

IMeya yaseNquthu, uMnuz Lindokuhle Shabalala, ithe bamatasa njengoba nakhona kulo masipala kubhujiwe ezigcemeni ezihlukene.

UShabalala uthe balinde ithimba eliphuma kwamasipala elizobatshela ukuthi ungakanani umonakalo owenzeke kuma-ward ahlukene.

IMeya yaseMzinyathi uMnuz Petros Ngubane iveze ukuthi imindeni ewu-357 yaseMsinga isale dengwane ngesikhathi lesi siphepho sicekela phansi imizi elinganiselwa ku-135.

Esitatimendeni abasikhiphele abezindaba bathe kule ndawo kusukela ngoLwesihlanu nangoMgqibelo izindawo ezikhahlamezeke kakhulu isoThulinilwezulu, Fabeni naseNgqungqulwini.

“NjengoMasipala waseMzinyathi nowaseMsinga simatasatasa sibazamela usizo bonke abagilekile ngenxa yesiphepho. Le nto isiyathusa ngoba izinhlekelele sezibuya ziphindelela. Siwumasipala simatasa nokutholela imindeni usizo olusheshayo ngokubambisana noMasipala waseMsinga sisalinde uMnyango wezokuBusa ngokuBambisana noBuholi boMdabu sizwe ukuthi ungasilekelela kanjani kule nhlekelele esivelele," kusho uNgubane.

Ngenhlanhla kuzona zonke lezi zindawo akukho muntu okubikwe ukuthi ushonile.

Namhlanje kulindeleke ukuthi uNgqongqoshe woMnyango wezokuBusa ngokuBambisana noBuholi boMdabu uMfundisi Thulasizwe Buthelezi ahambele eMondlo ukuze ayobona umonakalo odalekile.

Uveze ukuthi lesi sishingishane sihlasele omasipala okukhona kubo uMzinyathi, Thukela neZululand.